Skriflesing:  Johannes 3:1-36

Nog inligting om jou te help.

Nikodemus 

Was ‘n lid van die Joodse Raad, was ‘n Fariseër en dus ‘n man met hoë aansien. Dit sou dus ‘n skande gewees het indien hy sommer openlik na Jesus toe gekom het. Daarom lees ons hy het een nag (griekse teks sê middernag) na Jesus toe gekom. Ek verbeel my hoe hy in die agterstraaitjies gesluip het om na Jesus toe te gaan. Daar aangekom klop hy aan die deur en verbeel jou net vir ‘n oomblik hoe dit moes wees vir Jesus en sy dissipels om te besef wie daar staan. Hulle nooi hom in en dan vind ‘n wonderlike gesprek plaas.

Uit water en Gees gebore 

Baie keer is hierdie woorde misbruik om op ‘n manier hierdie gesprek aan die doop te koppel. Dit is egter glad nie die bedoeling nie. Jesus maak dit vir Nikodemus baie duidelik dat ware lewe, die koninkryk van God, net moontlik is deur ‘n nuwe geboorte. Die geboorte deur die Gees. Aanvanklik verstaan Nikodemus dit nie, maar eintlik is dit baie eenvoudig. Jesus sê elke mens moet twee keer gebore word. Ons almal word ten minste een keer gebore – uit water – dit is die biologiese geboorte en is menslik. Maar as jy deel wil wees van die Koninkryk van God en die ewige lewe wil ontvang, moet jy weer gebore word, hierdie tweede geboorte is nie biologies nie, maar geestelik. Jou gees moet nuut gemaak word deur die Heilige Gees!

Die slang op ‘n paal

Nikodemus sukkel om hierdie te verstaan (al is hy die bekende leermeester van Israel). Om dit verder te verduidelik gebruik Jesus die beeld van Moses wat ‘n slang op ‘n paal gaan sit het (lees gerus Numeri 21:4-9). Hierdie beeld het enige iemand wat deur ‘n slang gepik is en daarna gekyk het se lewe gered. (Tot vandag toe is hierdie medici se embleem – sien onderstaande prent).